عايزة أرجع لأصلى

أعترف لكم أنى أعانى هذه الأيام من اكتئاب واحباط ويأس

فأكتر احساس مؤلم فى الدنيا أنك تكون حاسس ان بقى عندك علم وخبرة وطاقة وحاسس انك لو اشتغلت ممكن تغير الدنيا وتضيف جديد لمجالك ولكن للأسف تتخرج من الجامعة ويقولولك مفيش مكان لك أصل احنا عندنا عمالة زيادة

وفجاة تحس أنك بقيت عالة على كل فرد فى المجتمع بقيت عبء ثقيل لا يمكن تحمله

تعرفوا انا لو رجعت بالزمن وقالولى تختارى تعيشى فين وازاى

كنت هاقول أنا نفسى أعيش فى الريف وتبدأ حياتى بمولدى

امى تولدنى فى بيت من طوب فى قريتنا بالقليوبية وأول ما اتعلم المشى اخرج مع بقية العيال فى الشارع اللى ادام البيت وأجرى ورا البط والفراخ والوز ولما يكون عندى ست سنين أروح معاهم غيطان الفراولة والقطن والقصب وأشتغل فى الغيط

ولما يكون عندى عشر سنين أمى تعلمنى الخبيز وعمل السمنة البلدى

ولما أوصل 15 سنة يجوزونى لسليم المتعلم المتنور أصله معاه دبلوم صنايع وبيشتغل فى الأرض الصبح وعنده ورشة بيشتغل فيها بليل

وبعد الجواز أغير منه فاروح أخد دروس محو الأمية وأرجع البيت وأقعد أخبز وأطبخ وأأكل الطيور وأغسل الغسيل ونحصد معاهم محاصيل القطن والفراولة
ويوم ما يحصل فرح نقعد احنا ستات البلد كلنا نطبخ ونخيز ونعمل الفطير

ولو حصل ميتم برده بنعمل أكل للرجالة والستات ونقعد نصوت عشان نجامل أم ابراهيم اللى جوزها مات

ونطلع الأرافة فى الرجبية ومعانا قرص نوزعها على العيال
وعلى سن العشرين يكون معايا أربع عيال وعلى الثلاثين ممكن يكونوا ستة أو سبعة

ومش هاوديهم مدارس برده هو كفاية عليهم الكتاب و بعدين الولاد تنزل مع أبوهم الغيط الصبح وبليل فى الورشة

وبعد كام سنة الاقى سليم جوزى حوش له قرشين فيشترى أرض تانى

ولما الولاد يكبروا ويكون عندهم 17 و18 سنة يجوزهم بعد لما يبنى دور كمان من الطوب فوق البيت

ولا يبنى لى أوضه فى وسط الارض عشان يراعيها

والله حياتهم أحلى من حياتنا على الأقل تحس أن كل فرد فى العائلة بيشتغل وينتج

أنا مش عارفة ليه دمروا حياتنا الزراعية والريفية بهدف التنمية

وفى الآخر لا فضلنا على حالنا ولا حققنا تنمية