Nov 30, 2008

رسالة الى نفسى


عملية البحث عن الذات أشبه برحلة شاقة.. إذ يجب علينا إسقاطُ جميع الأفكار الموروثة عن أنفسنا
فالإنسان يجمع كلَّ ما يقوله الناس عنه ويتماهى معه.. إننا ننسى صفاتنا الأصيلة ووجهنا
الحقيقي، ويصير هدفنا هو نوال إعجاب الناس وتقديرهم ورضاهم.

وللأسف فإن العالم الذي نعيش فيه ليس "متحضِّرًا"، كما يدَّعي، بل هو عالم همجي بدائي
يمجِّد القوة التي غالبًا ما تكون وحشية وظالمة ومنافقة.

باختصار، "جازف لتكون حقيقيًّا." فالوقت الذي نعيشه مستخدِمين الشخصية الزائفة هو
انتحار بطيء نمارسه على أنفسنا
الفيسلوف الهندى أوشو ...

Nov 8, 2008

الحب من تل أبيب 2


كثير منا يولد فى حياة قاسية تدفعه لتقديم تنازلات كثيرة ليعيش بين الناس ذليلا بسبب صراعات لا ذنب له فيها

لكن هل هذا المبدأ يمكن تطبيقه على عرب اسرائيل ؟


عندما اعترفت لى صديقتى بانها تحب شاب اسرائيلى حسبتها نزوها عادية مثلها مثل أى تجربة جديدة تعيشها لمجرد الشعور باللذة

والرغبة فى التجديد لكنى وجدت نفسى حائرة استرجع صور المذابح والقتل والاستعمار الذى تمارسه اسرائيل وحائرة ما بين الشعور بالغضب والشعور بالشفقة خاصة عندما حكت لى التفاصيل الدقيقة لحياة هذا الشاب


فهو شاب مسلم وسيم اسمه خالد ولد فى اسرائيل مثله مثل المليون وثلاثمائة وخمسون الف عربى الذين يعيشون هناك بعد ان رفضوا الخروج من أرضهم للعيش كلاجئين فى الدول الاخرى يبحثون عن يمستقبل مبهم ورضوا بكل أشكال الظلم الذى يتعرضون له يوميا


تعرفت صديقتى عليه فى السعودية ليقضوا مع بعضهم البعض ثلاثة شهور بعيدا عن أية ضغوط أو انتقادات

وعندما عادت الى مصر وجدت وجه آخر لكل من تحكى له حكايتها معه

صديقتنا الثالثة هددتها بمقاطعتها وانهاء صداقتها للابد لمجرد كلمة اسرائيلى

اما انا فسألتها هل ستتحملى الحياة فى اسرائيل وأن تحرمى اولادك من الجنسية المصرية ؟

ردت على .. الحياة فى مصر أصبحت لا تطاق أما فى اسرائيل فسيجدوا هناك حياة أفضل وتعليم أفضل وفرص عمل أحسن

وأنا على استعداد التخلى عن الجنسية المصرية فى مقابل الخروج من هنا وكل الدول العربية


ففى الخارج لن تجدى من يتربص بالآخر لاصطياد أخطاؤه ولن اجد احدا يتدخل فى حياتى ولن أجد من يدعى أنه ملاك باسم الدين وباسم الاخلاق وهى يرتكب كل انواع المعاصى لكن فى الباطن


نظرت اليها فى حزن وشفقة على حالها "المائل " بسبب غفلتها وقلة ايمانها بالله وبالوطن وقلت لها بأنها اذا استمرت فى تلك العلاقة لن أستطيع أن أقابلها او اكلمها كثيرا لأنى أريد ان أحافظ على ملفى الأمنى

فأنا لدى طموح فى عملى وأتمنى أن أمسك فى يوم من الايام أخبار الرئاسة وهذا يتطلب تحريات امنية دقيقة



انتهت مقابلتنا فى ذلك اليوم بعد حضن دافئ لا أجده الا بين ذراعيها وكل واحد منا يحمل فى صدره العديد من التساؤلات حول المستقبل الغامض الذى ينتظرنا كما يحمل علاقة صداقة دامت اكثر من15 سنة رغم كل الاختلافات بين شخصياتنا وطباعنا وفكرنا وسلوكنا

Oct 25, 2008

الحب من تل أبيب - 1



بين رحلة البحث عن الدين.. ورحلة البحث عن وطن

أخيرا عادت أعز صديقاتى من السفر بعد أكثر من ثلاثة أشهر قضتها فى الخارج بسبب عملها
عادت كعادتها ارتمت فى حضنى فى أول مقابلة لنا دون أن تكترث بنزلة البرد الشديدة التى أعانى منها
تقابلنا فى سيتى ستارز ومعنا صديقتنا الثالثة .... فنحن ثلاثة أصدقاء جمعتنا مدرسة واحدة ومستوى اجتماعى واحد ومستوى مادى يتقارب أحيانا ويتباعد أحيانا أخرى لكننا لا نأبه بهذا أبدا

نادرا ما يتذكر أحد السنوات الاولى له فى المدرسة أما أنا فلا أتذكر سوى يوم واحد فقط فى الصف الأول الابتدائى

اليوم الذى دخلت فيه الفصل بنت صغيرة عمرها 7 سنوات بفستان جينز قصير وشعرها الأسود الطويل يغطى أغلب وجهها وقدمتها لنا المدرسة بانها التلميذة الجديدة ولحسن حظى جاءت لتشاركنى فى مقعدى

ومنذ ذلك اليوم وهى تشاركنى فى كل شئ وأنا أحيانا أشاركها فى كل شئ

هذه هى صديقتى التى غابت عنى الثلاثة أشهر بسبب عملها
فكثيرا ما تبتعد فترة ثم تعود الى بشئ جديد وكنت أتقبله مهما كان

بين خلق الوجود وخلق الموجود

أتذكر يوم أتت لى يوما تعترف لى اعترافا خطيرا عن تعرضها لمحاولة تبشير بالمسيحية واقتناعها بها وذهابها للكنيسة مع ذلك الشاب المسيحى الذى أحبته والذى كان يلعب دور القديس الصغير ثم اكتشفت أن كل هذا كان بهدف اقناعها بزيارته فى منزله الذى يعيش فيه وحده وعندما لم تعطه ماأراده تركها ورجع لصديقته المسيحية

أعترف لكم أنى لم اتعصب عليها وقتها فقد كنت أنا أيضا فى نفس الوقت حائرة وكان يسيطر على سؤال واحد
ماذا لو لم أولد مسلمة ؟؟ وبدأت رحلتى لم فى البحث عن الديانات الموجودة فى العالم من البوذية وغيرها حتى وصلت الى المسيحية وطوائفها ثم الاسلام من جديد

وقتها شعرت بأنى لأول مرة أعلن اسلامى وأيقنت بأنى لو لم أولد مسلمة لوددت أن أكون مسلمة
عندما عدت من رحلتى كانت صديقتى بدأت نفس الرحلة لكن الفرق كان الدافع

فقد كان الدافع الرئيسى لى هو البحث عن الطمأنينة والاجابة عن السؤال الذى يراود الجميع هل فعلا ربنا موجود ؟؟
واذا كان الله - سبحانه وتعالى عما يصفون- هو خالق الكون .. فمن خلق الله ؟

ورغم أنى لم أجد اجابة عن السؤال الأخير فى الاسلام الا أنى لم اجده أيضا فى أى ديانة او فكر آخر

فعدت للاسلام بعد اقتناعى بتأجيل هذا السؤال الى يوم القيامة لأنى لم أجدد سببا منطقيا واحدا لوجود الوجود والكون سوى وجود الله سبحانه وتعالى
أما الدافع الرئيسى لها لبدء رحلة البحث عن دين جديد هو الحب

أحزنتنى كثيرا عندما حكت لى أنها رأت فى الحلم سيدنا عيسى عليه السلام وهو جالس على عرش كبير يضحك لها ناحية الشمال وسيدنا محمد عليه الصلاة والسلام واقف هو وأصحابة ناحية اليمين ينظر لها بغضب شديد وهى تقف فى الوسط حائرة بينهم

وبعد انتهاء قصة الحب التى عاشتها تناست قصة البحث عن الدين وكأن شيئا لم يكن.. أما أنا فلم أسألها ان كانت تابت الى الله أم لا

لكنى رأيتها تصلى العصر فى احدى المرات بعدها ولم أعلق لأنى مقتنعة بأن العلاقة بين العبد وربه لا تأتى من الخارج وأنما هى علاقة متبادله تكمن فى الشعور بالاطمئنان من العبد يعقبه شعور بالرضا من الرب

وبعد مرور 5 سنوات على هذه المشكلة عادت صديقتى بعد غياب ثلاثة أشهر ترتمى فى حضنى وتحكى لى قصة حبها الجديد
ذلك الشاب الوسيم الذى يعمل طيارا فى احدى شركات الطيران الخاصة .. استمعت اليها فى فرحة فى محاولة لدفع العلاقة الى منطقة الزواج الشرعى

ثم اعترفت لى اعترافا صغيرا تعتقد انه لا يمثل اى عقبة او حاجز بينهما لأن الحب أقوى من أى شئ فى الدنيا
وأن أهم شئ هو الارتياح بينهم وأنها رأت فيه الشخص التى تريد أن تقضى بقية عمرها معه
ولكن أين ...! فى اسرائيل
يتبع ................ء

Oct 3, 2008

من تراث العشق والهوى ورحلة البحث عن الحب



فى رحلة البحث عن الحب

أؤمن دائما بأن الأقدار هى التى تجمع شمل الأحبة لكنى أؤمن أيضا بأن الشيطان يشاركها فى هذا الدور
ليفسد كل معنى جميل فى أى علاقة لكن لا أحد ينكر أن وجوده كالتوابل التى لا يمكن الاستغناء عنها فى اعداد الطعام

خاصة فى بداية العلاقة ثم يبدأ يلعب دور الشر عندما تبدأ العلاقة فى السير نحو الطريق الحلال


منذ أن بدأت أفكر فى خوض هذه الرحلة الشاقة فى البحث عن الحب وأنا أفكر جيدا فى كيفية فض الاشتباك الدائر ليلا ونهارا بين القلب والعقل

فقلب المرأة يحركه اللهفة والرغبة الجامحة فى الاحساس بالامان حتى اذا كانت الثروة والنفوذ فى يديها

أما العقل فهو كالآلة يقارن بين الصفات الموجودة والصفات المطلوبة

فكان الاشتباك أقوى منى خرجت منه اليه

فنواميس الكون فرضت على الرجل أن يختار من يحبها وفرضت المرأة أن تختار من بين محبيها


لا يحق لها أن تغير نواميس الكون وأن تختار من تحبه خارج الاطار المسموح لها واذا فعلت ذلك قد تخسر الكثير والكثير

فكان الدرس الأول الذى كان يجب أن أحفظه دائما ألا أسعى الى الحب

فرضخت للأمر الواقع ورجعت من حيث أتيت محتفظة بسرى الصغير عن محاولة البحث عن الحب


قد يتعجب من يعرفنى جيدا اذا قلت له إنى فى رحلة البحث عن الحب نظرا للمظهر الجاد وعدم الرغبة فى الاحتكاك بالجنس الآخر والتى تصل فى بعض الأحيان الى سلوك عدوانى تجاه بعض الأشخاص الذين قد يحاولون الدخول فى حياتى



أصحابى المقربين كثيرا ماكانوا يوجهون الى اللوم والعتاب بسبب هذه التصرفات ولكنى اكتشفت أن كثيرا من تصرفاتى كانت نتيجة أفكار مترسخة فى العقل الباطن من حكايات الأهل خاصة الأم والجدة عبر سنوات كثيرة منذ ان كنت فى الثامنة من عمرى زادتها تعقيدا حكايات الحب الخادع فى الأفلام والمسلسلات مؤكدة الصور الذهنية التى صاغتها العائلة فى ذهنى
ورغم ان البعض قد يتصور أن هذه التنشئة لها سلبيات الا أن ايجابيتها كثيرة وجوهرية فى الحياة

أهمها أنها تجنب الوقوع فى تجارب فاشلة كما أنها تساعد الفتاة فى عدم استهلاك مشاعرها وارهاق القلب بما لا يستحق


فمنذ صغرى عرفت أن الرجل دائما صياد يبحث عن الفريسة ينتهى بسرعة من التلذذ بالفريسة السهلة ثم يلتفت للفريسة الصعبة
ولكن تلك التنشئة التى يعترض عليها البعض علمتنى أنى يجب أن اكون الفريسة المستحيلة بالنسبة له


الخطيئة .. والتراث الموروث



جدتى كانت دائما تقول لى حكمة .. لا تأمنن على النساء أخ ٌ أخٌ فليس على النساء من الرجال أمين
وتقصد بالأخ هنا .. أى رجل غير المحارم حتى وان كان أخ الزوج أو الصديق المقرب


ثم تعقبها بحكاية الرجال الثلاث الذين كانوا يريدون السفر ولكنهم كانوا خائفين على أختهم الوحيدة فاتفقوا مع قديس انها تجلس عنده حتى عودتهم وفى اليوم الأول كان القديس يضع الأكل على باب حجرة الفتاة ثم يطرق الباب ويمشى وبعد أيام وسوس له الشيطان فكان يطرق الباب وينتظر حتى تفتح وبعد أيام أخر طرق الباب ودخل أكل معها حتى تملكه الشيطان ففعل ما كان محرما عليه




أما أمى فكانت دوما تحذرنى من الوقوع فى الشبهات وتحذرنى من اعطاء الفرص لأى أحد أن يقول انى على علاقة به لمجرد كلمة قلتها له مزدوجة المعنى حتى لا أكون كعنقود العنب فى حكاية الذئب


ثم تحكى لى حكاية الذئب الذى كان يقف أمام شجرة عالية بها عنقود من العنب لم يرى مثله ابدا ويحاول الوصول اليه ولكنه فشل فكان يذهب الي هذه الشجرة كل يوم الى أن مر عليه ذئب فقال له ماذا تفعل ؟

رد عليه وقال يوجد علي هذه الشجرة عنقود عنب لم ارى مثله أبدا


فنظر اليه وهو يشتهيه بشدة لكنه قال للذئب الآخر لقد ذقت منه حبة ولم يعجبنى فكان طعمه سئ المذاق ولا يستحق كل هذا العناء

ثم تركوا الشجرة وقرروا عدم العودة اليها أبدا بسبب كذبة الذئب الذى أكد انه أكل من العنقود حبة وكانت مُرة رغم انه يشتهيها
وكانت هذه الحكايات ومثلها لها تأثير كبير علي لم أعرف قيمتها الا عندما كبرت وتخرجت من الجامعة واشتغلت


ورأيت حكايات وحكايات من الخداع والتجارب الفاشلة التى تركت مكانها جروح عميقة فى قلوب أصحابها

بل ودفعتهم لمعالجة الجرح بجرح أكبر دمر حياتهم وحياة أطفال لا ذنب لهم


فأغلبها كانت حكايات تؤكد على وجودة فطرة طبيعية تدفع الرجل الى معركة عنيفة مع المرأة يختبر قوة تمسكها بالأخلاق فان خسرت المعركة يتركها واذا انتصرت عليه يتزوجها ويستأمنها على اسمه وعرضه فهى الوحيدة التى يكون معها السر عن الأب الحقيقى لابنها


لأن المرأة التى تقع بسهولة فى فخ الرجال فلن يوفر لها الزواج الحماية الكافية

Sep 2, 2008

كلام مايهمش حد


كتيير منا بيحصلهم هزة فى حياتهم
وفجاة وبدون أى مقدمات يقف ويسأل نفسه هو أنا بعمل ايه ورايح لفين ...؟

هى ديه الحالة اللى بمر بيها دلوقتى ومخى شغال دلوقتى عمال على بطال ... بيفكر فى كل شئ وأى شئ ولكن فى طريق واحد بس
وهو كيفية التخلص من كل شئ تعرضت له الفترة اللى فاتت بالذات الآثار السلبية للتجارب التى لا تفيد اللى افتكرت فى لحظة من اللحظات انها مهمة وانها مظهر لابد منه فى حياتى العملية

ورغم أنها قد تبدوا للبعض فترة قاسية بعض الشئ وقد يلومى البعض عن طريقة تفكيرى وانى بقول ان مش كل التجارب فى الحياة بتفيد

بس صدقونى أصعب شئ فى الحياة أنك تكون على الطريق الصح وتبص على الطرق الملتوية الأخرى التى تأخذك الى نهاية مسدودة

بالذات لما كتير حواليك يقنعوك أن الطرق الأخرى هى الأحلى وانهم سعداء فيها ولما تمشى فيها تحس اد ايه ان السعادة اللى هما بيقولوا عليها ديه سعادة زائفة ومجرد وهم

فمفيش سعادة فى الدنيا كاملة غير السعادة اللى فيها صفاء النفس والشعور بالطمأنينة وديه محدش بيوصلها غير فى احساسك بوجود الله وايمانك بيه .. فى اللحظة ديه بتحس انك ملكت الدنيا والآخرة

Aug 9, 2008

هدنة مع النفس

كل عام وأنتم بخير بمناسبة رمضان
وندعو الله أن يتقبلنا عنده برحمته الواسعة
أصحابى الأعزاء لقد قررت التوقف عن الدخول على الانترنت لمدة شهرين كمحاولة
للتخلص من ادمان الانترنت وقضاء ساعات عليه
اتمنى ان ماحدش يزعل منى وكل سنة وانتم طيبين
التائهة فى أرض الأحلام .. مى

Aug 2, 2008

عشر رجال لا يصلحون للزواج




الأول ابن "ماما" المدلل: رقيق ولطيف وناعم بعض الشيء ربما يكون لديه "كرش" صغير من أكل "ماما"، يقضي معظم وقت فراغه في البيت. الشيء الذي يشدك إليه في البداية.. أنه يحب مشاهدة برامج المرأة و"طبق اليوم" معك.

الشيء المرعب.. أنه سبق وشاهد كل هذه الحلقات.

علامة الخطر: يقول إنك أنت الفتاة التي كانت تحلم بها والدته طوال عمرها لتكون زوجة لابنها ويعرفك عليها في أول لقاء بينكما.

لكي تتخلصي منه اعترفي له أنك تفضلين الرجل الذي ينتقي ملابسه بنفسه ولايعتمد علي ذوق ماما.


الثاني البخيل: ثري في أغلب الأحيان لكن لا يبدو عليه ذلك، لا يظهر في الحفلات والمناسبات إلا إذا كان مدعوا، يتزوج في سن متأخرة. الشيء الذي يشدك إليه في البداية ..ذكاؤه وحرصه الشديد على عمله وعلى مستقبله وطموحه الكبير.

الشيء المرعب ..أن أمواله تسير في اتجاه واحد: إلى البنك وطريق العودة مغلق دائما للإصلاحات!


علامة الخطر.. يمرض فجأة يوم ميلادك حتي لا يضطر لشراء هدية.


يختفي 10 دقائق في الحمام وقت دفع الحساب في أي مطعم أو مكان عام!


لكي تتخلصي منه ..اخبريه أنك أكثر البنات إسرافا على وجه الأرض!


الثالث مدمن الرياضة: قوي البنيان، جريء، على استعداد دائم للعب مباراة كرة قدم للتسلية.يفضل الملابس الرياضية. الشيء الذي يشدك إليه في البداية... مظهره الذي يوحي بالقوة، وهذه الحيوية الشديدة التي يتمتع بها.


الشيء المرعب .. انه يقضي معظم وقته في صالة الألعاب الرياضية حيث يبني هذه العضلات وبقية الوقت أمام المرآة يختبر صلابتها!

علامة الخطر .. اول مرة يدعوك للعشاء بالخارج سيختار مكانا به شاشة عملاقة لا تعرض سوي قنوات الرياضة المتخصصة


لكي تتخلصي منه..اعرفي فريق الكرة الذي يشجعه وادعي أنك من أكبر مشجعي الفريق المنافس.


الرابع خبير الموضة: أنيق جداً، واثق من نفسه، يعرف آخر صيحات الموضة ومعلوماته في هذا المجال تفوق معلوماتك. الشيء الذي يشدك إليه في البداية .. ملابسه سواء كانت عادية أو رسمية تحمل دائما توقيع بيت أزياء شهير ألوانه متناسقة، يهتم جدا بالإكسسوار (الحزام والكرافات). باختصار رجل مبهر..


الشيء المرعب ..أن دولاب ملابسه سيجعل دولابك أنت يبدو فقيراً ويرثي له!


علامة الخطر .. يفضل "الشوبنج" علي قضاء اليوم معك وعندما يراك لا يكف عن إعطائك النصائح والعناوين اللازمة لتصحيح مظهرك. لكي تتخلصي منه.. يكفي سؤال بريء: من هو ايف سان لوران هذا؟


الخامس محب النساء: سواء كان غاية في الوسامة أو كان رجلا عاديا.. هناك شيء في هذا الرجل يجعلك تلتفتين إليه. فهو يعامل النساء كأنهن من ماس، لأنه يحبهن ـ جميعهن ـ جداً. الشيء الذي يشدك إليه في البداية.. يعرف كيف يجامل وكيف يقول كلاما يمس الوتر الحساس في القلب.


الشيء المرعب .. إنه يستخدم نفس الأسلوب مع كل النساء. علامة الخطر .. يناديك باسم فتاة أخرى أثناء حديث عاطفي.


لكي تتخلصي منه.. أخبريه أن والدك بطل في الرماية وأنه يريد أن يتعرف عليه فوراً!


السادس الخيالي: هاديء، قليل الكلام، صوت خافت وحديثه بطيء قد لا تلاحظين وجوده وسط أي تجمع. الشيء الذي يشدك إليه في البداية ..شيء غامض يلفه ويثير فضولك فتحاولين اكتشافه وتغريك رقته وابتسامته الودودة. الشيء المرعب..إنه يتعامل مع الناس حسب الصورة التي رسمها في خياله وليس حسب شخصياتهم الحقيقية.. وطموحه خيالي وغالباً لايسعي لتحقيقه.


علامة الخطر.. يختفي عادة وقت الغروب ليتأمل الشمس ويعود وعلى وجهه علامات الكآبة. لكي تتخلصي منه.. أخبريه أنك من هواة مشاهدة أفلام الحركة "الأكشن" وأن رياضتك المفضلة هي المصارعة الحرة.



السابع مشروع المؤلف: يرتدي نظارة طبية أنيقة ويحمل دائما صحيفة أو كتابا في يده يستعرض ثقافته الواسعة أثناء الحديث ويدعي معرفته العميقة بطبيعة النفس البشرية. الشيء الذي يشدك إليه في البداية .. لباقته في الكلام وأفكاره المرتبة وحديثه الجذاب.


الشيء المرعب.. أنك سوف تعيشين مع فنان متقلب المزاج: لاعشاء في الخارج، لا هدايا في المناسبات، يقضي معظم وقته شارداً يبحث عن فكرة جديدة.


علامة الخطر.. إنه يفتعل شجارا بينكما أو حتى مشهد انفصال ليكتب مشهدا واقعيا في رواية جديدة.


لكي تتخلصي منه.. أخبريه أن سلسلة "لوريل وهاردي" من أجمل الأفلام المقتبسة من أعمال أدبية وأن فيلم "ذهب مع الريح" من افشل الرويات التي رأيتها في حياتك التي قدمت في السينما.


الثامن مدمن العمل: رجل أعمال بمعني الكلمة: ذكي، طموح، أنيق و"غير متاح" طوال الوقت. الشيء الذي يشدك إليه في البداية.. رجل جذاب وناجح ماذا تريدين أكثر من ذلك؟


الشيء المرعب.. راجعي عبارة "غير متاح" ضمن صفاته وفكري في معانيها المتعددة وتأثيرها على حياتك في المستقبل.


علامة الخطر.. تكتشفين فجأة أن سكرتيرته أصبحت صديقتك المقربة لأنها هي الوحيدة "المتاحة" "دائما" عندما تطلبينه في المكتب.


لكي تتخلصي منه..أخبريه أنك على استعداد لقضاء عدة ساعات معه في مكتبه كل يوم طالما أنه لا يملك وقتا لرؤيتك ونفذي الاقتراح.


التاسع الوحيد: لطيف، رومانسي، ليس له أي أصدقاء يؤمن بأن الشمس تشرق وتغرب كل يوم من أجلك أنت فقط. الشيء الذي يشدك إليه في البداية..كل هذا الاهتمام لا بد أن يحرك مشاعرك كما أنه شخص حساس جداً .. كل من حولك يقولون إنه يحتاج فقط لفرصة لكي يقنعك بحبه ويجعلك تحبينه.


الشيء المرعب..أنه فعلاً على استعداد لكي يفعل أي شيء من أجلك ويحرص على أن يبقى بجانبك "طوال" الوقت أليس هذا مرعبا؟!

علامة الخطر..أنه يريدك أن تكوني متفرغة له تماماً! لكي تتخلصي منه..أخبريه أن أجمل أوقاتك هي التي تقضينها وحيدة.. وإنك تقدرين الخصوصية!


العاشر عاشق بالمساواة: متحمس، متحدث لبق، يحب الكلام في السياسة، يقدر الدور المزدوج الذي تلعبه المرأة في المجتمع. الشيءالذي يشدك إليه في البداية.. حماسه في الدفاع عن قضايا المرأة وضرورة المساواة في كل شيء بينها وبين الرجل. يجعلك تشعرين أنك ستحصلين معه على كل احترام وتقدير. شيء آخر رائع: أنه لا يحب مشاهدة القنوات الرياضية على الإطلاق!


الشيء المرعب.. في هذه العلاقة سوف تحرمين من أشياء كثيرة لن يفعلها هو لأنها ضد مبادئه مثل أن يفتح لك باب السيارة، يدفع الحساب في مطعم، يرسل لك زهورا أو حتى يوصلك بسيارته إذا تأخر بك الوقت وأنت في الخارج.


علامة الخطر.. سوف يحب أن يترك لك معظم المسؤوليات المادية ليساعدك على الإحساس بكيانك المستقل! لكي تتخلصي منه.. اخبريه أنك تبحثين عن رجل تعتمدين عليه ماديا ومعنويا



منقول من احد المواقع


ملحوظة : لن تجدى رجل خارج هذه التصنيفات بس اهو ضل راجل ولا ضل حيطة

Jul 16, 2008

مأسآة الموسم



فى انتظارك دوما ... ياعزيزى

Jul 12, 2008

ياترى هو احنا اللى بنهين لفظ الجلالة ولا هما ؟


بصراحة أنا مش فاهمة الهبل اللى بيحصل ده

كل شوية يجى لى تحذير مجهول المصدر قاطعوا البضائع الفلانية بسبب اهانتها للفظ الجلالة

وابص على اللى هما بيقولوا عليه مالاقيش لفظ الجلالة اصلا واحس اننا احنا اللى بنهين لفظ الجلالة اصلا بتخيلنا ان اى تكرار لحرف اللام بيبقى كلمة الله
ده غير تخيلاتنا بجمل غريبة مثل الدعوة لمقاطعة مشروب كوكاكولا بسبب اننا لو قرأت الشعار من الخلف هاتلاقى مكتوب جملة لا اله لا محمد وبحاول بقالى كام سنة انى اقعد اتخيل مثلهم هذه الجملة على الزجاجة ماعرفش
يعنى هما وهما بيعملوا الشعار قصدوا انهم يكتبوا كدة لاستفزاز المسللمين ؟ بصراحة تفكيرنا بقى عجيب


وآخر هذه الدعابات البايخة مانشرته جريدة الوفد عن اهانة لفظ الجلالة بمحلات عمر افندى وذلك لما اكتشفوا وجود حذاء مكتوب على نعله لفظ الجلالة والغريب انهم صوروه وانا اهو بقالى ساعة بدور على لفظ الجلالة اللى هما بيقولوا عليه مش لاقيه

معاكم تفاصيل الخبر ومعاكم الصورة ياربيت حد يفهمنى اللى بيحصل


إهانة للفظ الجلالة في فروع عمر أفندي

شهد أحد فروع شركة عمر أفندي المملوكة لشركة أنوال »السعودية« واقعة غريبة تضمنت إهانة للفظ الجلالة.. قامت إدارة فرع عدلي بوسط البلد بشراء كميات كبيرة من الأحذية محفور علي نعلها لفظ الجلالة بشكل بارز. كشف أحد العاملين بالفرع عن أن هذه الأحذية مجهولة المصدر ولا يوجد لها فواتير شراء. كانت الشركة قد اشترت كمية كبيرة من هذه الأحذية منذ 7 أشهر وعندما علمت الإدارة بالواقعة لم تعدها إلي مصدرها.
يبلغ ثمن الحذاء الواحد 70 جنيها وبعد تراجع المبيعات من قبل الجمهور خفضت الشركة سعر الحذاء إلي 30 جنيها

Jun 4, 2008

خصخصة الاسعاف المصرى





يبدو أن كل شئ فى مصر أصبح قابل للبيع بسبب السياسة الرشيدة لحكومتنا المبجلة التى لا تتوانى لحظة فى ارهاق المواطن المصرى وتعذيبه بكل السبل الاقتصادية والصحية والنفسية


حيث أصبح كل وزير يفكر فى كيفية جنى الأموال من الشعب من خلال تقديم خدمات وزارته بشكل استثمارى

متناسيا أنه بالاساس يتواجد فى هذا المنصب لخدمة بلده وشعبه


وضمن مفاجآت الحكومة الذكية طالعتنا الجرائد اليوم بالمشروع الجديد لوزراة الصحة تحت اسم جديد وهو إسناد إدارة الإسعاف للشركة الأجنبية

ولأول مرة فى تحقيق صحفى يقع فى اول صفحة الأخبار بجريدة قومية وهى الأهرام المسائى نجد هجوم حاد على مشروع قرار الوزير حاتم الجبلى وزير الصحة والسكان


بصراحة ليس لدى أى تعليق سوى تجربتى الشخصية التى مررت بها مع سيارات الاسعاف حيث أخذ العاملين على سيارة الاسعاف منا أكثر من خمسين جنيه مرة لنقل جدى من البيت للمستشفى داخل القاهرة ومرة أخرى 50 جنيه أيضا لنقل أبى من مستشفى لمستشفى أخرى بعد محاول للبحث عن سرير خالى فى غرفة العناية المركزة فى احد المستشفيات فى الاسكندرية ومرة اخرى اكثر من 100 جنيه لنقل خالتى وزوجها واولادها الى المستشفى

وحدث ذلك وقت ما كان الاسعاف يتبع القطاع العام فماذا سندفع نحن اذا تم خصخصتها

وحتى لا أنسب المعلومات التى عرضها التقرير الصحفى لنفسى سأضعه بين أيديكم كما كتبه الاستاذ محمد حسان رئيس قسم المتابعات بالأهرام المسائى


الدولة أنفقت علي تطويره‏800 ‏ مليون جنيه من اللحم الحي
الإســعاف‏..‏ إيــجـار أم تـــمـليك؟
لماذا يريد وزير الصحة تحويل الإسعاف إلي هيئة اقتصادية مستقلة؟
أسرار الاتفاق مع شركة ميد كير لإدارة المرفق بعيدا عن القوانين المصرية‏!
‏من يتحـمل تكاليف نــقـل المــرضي والمــصابين غـــير القادرين عـلي الســداد؟
تقرير يكتبه‏:‏ محمد حسان

‏وكأن وزارة الصحة والسكان أصبحت حقلا للتجارب التي لا تستهدف الوصول إلي شفاء المريض وإنما قتله دون جرعة مخدر زائدة‏,‏ أو عدوي ميكروبية خلف سرير المستشفي‏,‏ أو فيروسية من خلال محاليل أدمنت التلوث وخالفت المواصفات وابتعدت عن حدود التعامل الآدمي‏.‏تجارب الصحة هذه المرة تنطلق من الإسعاف ويقودها جهابذة التغيير الإداري المزعوم بعقلية ما يسمونه بالقطاع الخاص الذي هو بريء من مصالحهم وأرباحهم وتجاربهم الفاشلة‏.‏فقد تكشفت أمام الأهرام المسائي وقائع جريمة منظمة يتم ترتيبها لضرب واحد من أهم قطاعات الصحة وهو الإسعاف حيث يتردد أن الدكتور حاتم الجبلي وزير الصحة والسكان يخطط لتحويل الإسعاف إلي هيئة اقتصادية وهي الصورة الممسوخة لما يمكن تسميته بخصخصة الإسعاف بشعار أنقل إلي المستشفي من يستطيع دفع تكاليف سيارة الإسعاف وأترك من لا يستطيع دفع التكاليف يموت علي اعتبار أن وزارة الصحة هي المسئولة عن تنظيم الأسرة وبالتالي يقدم د‏.‏ حاتم مصطفي الجبلي طريقة مبتكرة للتخلص من الناس خاصة من ضحايا المرض والحوادث والكوارث وكأنها نظرية جديدة لقارب النجاة الذي يتخلص من الأفقر والأكثر مرضا حتي يصل إلي شاطئ الأثرياء‏!!‏ورغم أن الدولة خصصت‏800‏ مليون جنيه من حصيلة بيع الأراضي في المدن الجديدة لتحديث الإسعاف وتطويره وهو ما ظهر بوضوح في‏758‏ من نقاط الإسعاف المنتشرة علي مستوي الجمهورية وتطوير الاتصالات فيما بينها وتدريب‏5200‏ مسعف وحوالي ألفي سائق وأكثر من ألف من أطباء الطوارئ إلا أن وزير الصحة والسكان ومساعديه استكثروا علي المصريين أن يمتلكوا قطاعا ناجحا‏.‏فذهب عقل الوزير إلي أوروبا باحثا عن شركة يقال إنها عالمية وتسمي ميد كير‏911‏ وقيل إن لها تجارب عالمية في المساعدة في تطوير وتحديث الخدمات الإسعافية في جنوب إفريقيا وقرر أن يتفق مع الشركة علي إدارة ما سوف تتم تسميته بـ هيئة إسعاف مصر حسب الدراسة الوهمية التي تم إعدادها لخداع رئيس الوزراء وباقي مسئولي الدولة رغم أنه تم شراء سيارات الإسعاف الجديدة‏,‏ وبناء نقاط الإسعاف وشراء ملابس المسعفين وكل مستلزمات التحديث من موازنة الدولة‏,‏ ومما يسميه الفقراء باللحم الحي علي اعتبار أنه من أموال بيع أراضي الدولة علي أن يسلم كل ذلك إلي الشركة الأجنبية صاحبة المعجزات في إدارة الإسعاف وعلي اعتبار أن أصحاب التغيير المزعوم في وزارة الصحة يفتقدون الثقة في قدرة أي مصري علي إدارة الإسعاف‏,‏ وحتي يدار المرفق بعيدا عن القوانين المصرية استكمالا لمعجزات ماكنزي والشركات المتعددة الجنسية في الصحة والدواء‏.‏وتم بالفعل عرض ملف الشركة الأجنبية علي اللواء أركان حرب أحمد فرج مساعد وزير الصحة للشئون المالية لحسم إسناد إدارة الإسعاف للشركة الأجنبية بالأمر المباشر ودون مناقصات علي أساس أنها بلا منافس وتعطي لكل ضحية في حادث أو مأساة بدلا من الروح روحين مع ضمان بعمر لا يقل عن‏100‏ سنة استثمارية أما الأرباح فيحددها مسئولو الصحة الذين جهزوا الأكفان لكل قطاعات الصحة لدفنها في مدافن القطاع الخاص القريبة إلي الفؤاد‏.‏وزير الصحة وهو يقدم ما يدرس تسميته هيئة إسعاف مصر هدية للشركة الأجنبية صاحبة المعجزات‏,‏ إنما يهدي تلك الشركة أول إسعاف طائر أو مرسي بحري ونهري للإسعاف و‏758‏ نقطة مطورة للإسعاف وبالتالي فإن الشركة ستقوم بالربحية فقط لمصلحة مستثمري وزارة الصحة والسكان‏.‏سألت أحد مسئولي العلاج الطبي بوزارة الصحة عن حقيقة ما يجري في الإسعاف فقال بالحرف الواحد‏:‏ يا جماعة حرام عليكم دي مش خصخصة‏..‏ دي إدارة‏..‏ أصل دي أكبر شركة لإدارة الإسعاف‏.‏ سألته‏:‏ وهل ستحل مشكلات الشوارع الضيقة حتي يصل الإسعاف في موعده‏..‏ ولم يرد طالبا مني التوجه إلي مسئول بوزارة الصحة‏.‏ وعدت لأسأله‏:‏ ولماذا يتم تحويل الإسعاف إلي هيئة اقتصادية ورد‏:‏ لقد طورت الدولة الإسعاف ومن حقها أن تحرره من القيود الروتينية في الإدارة‏.‏ سألت‏:‏ ومن يدفع؟ رد‏:‏ المصاب التابع للتأمين الصحي ستتحمل الهيئة تكاليفه والفقراء تتحملهم وزارة التضامن الاجتماعي وكان عليه أن يضيف‏:‏ أما من لا يتضح أنه من الفقراء وليس مشتركا في التأمين الصحي فإنه يترك في مكان الحادث حتي يموت‏!!‏

Apr 19, 2008

ياترى مين هى الحكومة الجاية ؟

سؤال جه على بالى نتيجة اشاعة طلعت عندنا فى الشغل عن تغيير وزارى مرتقب وهو
ياترى مين هى الحكومة الجاية ؟؟؟

هاتكون برده رجال أعمال ولا أساتذة جامعة ولا مجرد ناس محظوظة رماها القدر فى هذا المنصب بالصدفة

نظيف
رئيس الوزراء




بيقولوا انك حاولت تعمل حاجة كويسة فى البلد .. بس بصراحة أنا ماحستش بحاجة
حد فيكم حس بحاجة ؟؟؟
رشيد محمد رشيد

وزير التجارة الخارجية والصناعة




قابلته كذا مرة و انسان فعلا هادئ و محترم جدا على المستوى الشخصى
ويمكن علشان هو مش ابن سوق ولبط زى مابيقولوا ماعرفش يظبط السوق
عشنا فى عهدك أقوى موجة لارتفاع الاسعار ..وأرجوك ماتقولش الاسعار العالمية أكيد كان فيه 100 حل
لأنك وصلتنا أننا بقينا نترحم على أيام التسعيرة
بس ماحدش هاينسى اللى عملته وانشائك لجهاز حماية المنافسة ومنع الاحتكار وجهاز حماية المستهلك
ونتمنى أن اللى يجى بعدك يعرف يفعل دورهم
محمود محيي الدين

وزير الاستثمار



مهما عملت ماحدش هاينسى ان فى الفترة اللى مسكت فيها قدرت تبيع أكبر عدد من شركات القطاع العام
الجاهزة هدايا لرجال الأعمال اللى بقوا يتحكموا فى قوت الشعب

بدل لما تشجعهم انهم يبنوا مصانع جديدة ويعملوا شركات جديدة تزود بيها الانتاج
صدقنى لو كنت عملت كدة كان ممكن نصدق أن فيه 10 مليارات دولار استثمارات اجنبية جديدة فى مصر
لكن الى انت عملته انك بعت استثمارات المصريين للأجانب
و بقى كدة يامحيي عايز تلغى نظام تقسيط الشقق وتخلى النظام الأساسى التمويل العقارى علشان الشباب يدفع فائدة 8 و9 % فائدة مركبة غير حق الشقة ومصاريف اجراءات الحصول على التمويل
بصراحة يا محيي أنت مفترى على الشعب
أحمد المغربى


وزير الاسكان فى الشارع


لما الشقة ال100 متر توصل ل500 ألف فى الفترة اللى مسكت فيها الوزارة أكيد فيه حاجة مش مظبوطة

ولما رجل أعمال ياخد أراضى بالفداداين ببلاش علشان يبنى مدينة سكنية الشقة فيها ب800 ألف جنيه برده فيه حاجة مش مظبوطة
ولما أنت تحط سياسة أن يكون اسكان الشباب كله الجديد شقق 60 متر اوضة وصالة علشان تقلل الزيادة السكانية ويطلع عنيهم علشان يعرفوا ياخدوا الشقة وفى الآخر تبيع أراضى بتراب الفلوس علشان يتعمل عليها قصور وفيلل ومدن سياحية يبقى استفزاز صريح للشعب ولا لا

نكتة : المغربى فى بيان صحفى أن أسعار الشقق فى مصر بقت فى متناول الشباب .. السعودى والعراقى والاماراتى


يوسف بطرس غالى

وزير المالية


عارفة أنك وزير بقالك كتير .. يمكن من قبل مااتولد كمان
وعلى فكرة انا اشتغلت فى وزارتك شوية وشفت الأبهة اللى انتى عاملها هناك بجد أنت مخلى وزارتك جنة بالذات مكتبك ومكتب المستشاريين بتوعك
ورغم انك طلعت عين الشعب بالضرائب بالذات أنا لأنى مستاءة كتير من موضوع الضرائب الدخل ديه
بس أنا مبسوطة منك لأنك أنت اللى فتحت نفس الشعب على الاضرابات
وعلشان كدة هاديك اعفاء مش هاتكلم عن سلبيات تانى
بس كلمة فى ودنك الكبيرة ديه .. أنا عندى احساس انك لو قعدت الحكومة الجاية أكيد هاتدخل التاريخ لأنك هاتكون السبب فى الثورة اللى هاتحصل فى مصر
حبيب العادلى


وزير الداخلية



مرة ظابط شرطة قالى ان الوزير ده لو ماسبش الوزارة والصحفيين بعدوا عنا .. يبقى أحسن يخصخصوا وزارة الداخلية لأننا مش عارفين نشتغل
بس أحييك على الفيلم الرعب اللى عملته لنا يوم الاضراب .. بصراحة كان عرض رائع كنت خايفة أتنفس وانا ماشية فى الشارع
وأكيد أثبت قدرتك على كبت الحريات وخنق أى محاولة لانفلات الأمن
بس كنت بسأل نفسى هو لو مصر حصل عليها عدوان هانلاقى فعلا الأمن ده
ونفسى أسالك هو انت ليه شاطر فى تكميم الأفواه ومش عارف تظبط المرور
أنا عندى احساس كبير انك مش هاتتغير مع التغيير الوزارى بس لو فعلا كملت فى الوزراة سيبك من حبة المثقفين دولا اللى بيهددوا بالاضراب وظبط لنا المرور الله يخليك لحسن اتخنقنا خلاص
محمد منصور
وزير النقل


مش عارفة أقولك ايه بس انت افتريت على الشعب أوى علشان حرام عليك تحط عبء ارتفاع تذاكر المواصلات كمان على الشعب
رغم ان ده المجال الوحيد اللى بيجيب تكاليفه خلى الاتوبيس المكيف زى ماهو بس حرام عليك اتوبيسات الغلابة تخليها بجنيه وجنيه ونصف
وتخلى متوسط انفاق الاسرة على المواصلات علشان يروحوا الشغل والمدارس والجامعات 10 جنيه فى اليوم
فكر فيها كدة وراجع نفسك
على مصيلحى
وزير التضامن الاجتماعى


أنا آسفة لأنى بجد مش بحب أجرح حد بس بجد
أنت اكتر وزير فشلت فى مهمتك لانك اكيد ماكنتش فاهم انت المفروض تعمل ايه اصلا

والدليل على كدة ان الرئيس تدخل شخصيا علشان يشوف حل فى موضوع الطوابير العيش ديه
وكمان ده الرغيف وصل فى عهدك ل50 قرش يا مفترى
أنا لو كنت منك كنت قدمت استقالتى علشان مش كل مرة حد يروح يشترى فيها عيش يدعى عليك
وبالذات لو نام جعان أكيد ربنا مش هايرحمك

Apr 7, 2008

وقفة تأمل





قال رسول الله صلي الله عليه وسلم
يأتي زمان على أمتي يحبون خمس وينسون خمس.. يحبون الدنيا وينسون الاخرة يحبون المال وينسون الحساب يحبون المخلوق وينسون الخالق يحبون القصور وينسون القبور يحبون المعصية وينسون التوبة فإن كان الامر كذلك أبتلاهم الله بالغلاء والوباءوالموت الفجأة وجور
الحكام






صدقت يا رسول الله

Mar 30, 2008

عايزة أرجع لأصلى

أعترف لكم أنى أعانى هذه الأيام من اكتئاب واحباط ويأس

فأكتر احساس مؤلم فى الدنيا أنك تكون حاسس ان بقى عندك علم وخبرة وطاقة وحاسس انك لو اشتغلت ممكن تغير الدنيا وتضيف جديد لمجالك ولكن للأسف تتخرج من الجامعة ويقولولك مفيش مكان لك أصل احنا عندنا عمالة زيادة

وفجاة تحس أنك بقيت عالة على كل فرد فى المجتمع بقيت عبء ثقيل لا يمكن تحمله

تعرفوا انا لو رجعت بالزمن وقالولى تختارى تعيشى فين وازاى
كنت هاقول أنا نفسى أعيش فى الريف وتبدأ حياتى بمولدى

امى تولدنى فى بيت من طوب فى قريتنا بالقليوبية وأول ما اتعلم المشى اخرج مع بقية العيال فى الشارع اللى ادام البيت وأجرى ورا البط والفراخ والوز ولما يكون عندى ست سنين أروح معاهم غيطان الفراولة والقطن والقصب وأشتغل فى الغيط


ولما يكون عندى عشر سنين أمى تعلمنى الخبيز وعمل السمنة البلدى

ولما أوصل 15 سنة يجوزونى لسليم المتعلم المتنور أصله معاه دبلوم صنايع وبيشتغل فى الأرض الصبح وعنده ورشة بيشتغل فيها بليل

وبعد الجواز أغير منه فاروح أخد دروس محو الأمية وأرجع البيت وأقعد أخبز وأطبخ وأأكل الطيور وأغسل الغسيل ونحصد معاهم محاصيل القطن والفراولة
ويوم ما يحصل فرح نقعد احنا ستات البلد كلنا نطبخ ونخيز ونعمل الفطير


ولو حصل ميتم برده بنعمل أكل للرجالة والستات ونقعد نصوت عشان نجامل أم ابراهيم اللى جوزها مات

ونطلع الأرافة فى الرجبية ومعانا قرص نوزعها على العيال
وعلى سن العشرين يكون معايا أربع عيال وعلى الثلاثين ممكن يكونوا ستة أو سبعة

ومش هاوديهم مدارس برده هو كفاية عليهم الكتاب و بعدين الولاد تنزل مع أبوهم الغيط الصبح وبليل فى الورشة

وبعد كام سنة الاقى سليم جوزى حوش له قرشين فيشترى أرض تانى

ولما الولاد يكبروا ويكون عندهم 17 و18 سنة يجوزهم بعد لما يبنى دور كمان من الطوب فوق البيت

ولا يبنى لى أوضه فى وسط الارض عشان يراعيها

والله حياتهم أحلى من حياتنا على الأقل تحس أن كل فرد فى العائلة بيشتغل وينتج

أنا مش عارفة ليه دمروا حياتنا الزراعية والريفية بهدف التنمية

وفى الآخر لا فضلنا على حالنا ولا حققنا تنمية

Mar 24, 2008

قال ايه !! ..أنا مش مزة






والله الناس فعلا اتجننت


بس جنون عن جنون يفرق ..انا ممكن استحمل كل انواع الجنون الا الجنون ده




قال ايه ....! جالى دعوة للمشاركة فى حملة جديدة اسمها .. والله مكسوفة أقوله


اسمها حملة ... أنا مش مزة


صحيح ناس فاضية مجموعة بنات عملوا جروب علشان يشيلوا كلمة مزة من الاستخدام اللغوى وعدم استخدامها للاشارة لأى امرآة


وتقول مقدمة الحملة


مش ممكن نطالب بحقوق مرأة أو ان الست في مصر توصل لمناصب قيادية وهي مجرد مزة! مين هينتخب مزة عشان تمثله ف البرلمان؟ مين هيروح لدكتورة مزة عشان تعالجه؟ مين هيحترم استاذة مزة بتدرسله؟ ازاي المجتمع هيعاملنا ياحترام وياخدنا بجدية واحنا واقفين نتفرج عليه وهو بيخترعلنا اسم جديد وبيفرضه علينا بكل وسيلة وفي كل مكان؟


مايعرفوش ان فيه كتير ممكن ينتخبوا ست فى البرلمان علشان هى فعلا مزة


والراجل ممكن يودى ابنه ولا بنته عند مدرسة علشان هى مزة


ده احنا فى البلاد العربية الوحيدين بنروح نعمل حوار تلفزيونى مع رقاصة أو مغنية من اياهم عن دورها فى قضية فلسطين


او رأيها فى قضية فساد


وكمان هو مين قالهم أن اسم مزة ده جديد ...أو ان معناه وحش


لو رجعنا لأصل الكلمة فى اللغة ممكن يكون مشتق من اسمين


الأولى موز .. وهى فاكهة حلوة المذاق


الثانية مزة بفتح الميم وسكون الزاى .. وهى مايؤكل بجانب الخمر فى الكابريهات



فاذا افترضنا ان الشاب الذى قال لها انتى مزة وكان يقصد المعنى الأول فهو شخص قصده نبيل وهو التعبير عن جمالها


اما ان كان يقصد المعنى الثانى فهو شخص قصده غير شريف ولكن يحمل فى طياته قدر من الاعجاب ورغبة فى القرب منها بسبب الملابس ا لتى ترتديها او الطريقة التى تمشى بها وتتشبه ببنات الليل ان لم تكن فعلا كذلك


وكمان ماهو الولاد غلابة برده .. يعنى لو شافوا بنت حلوة مثيرة ترتدى من الملابس ما يعرى أكثر ما يستر وتمشى فى الشارع تتراقص


وتضحك على الفاضية والمليانة


هايروح لصاحبه يقول اسكت يالا بص البنت التى تمشى تتمايل وترتدى كذا وكذا .. لا طبعا هاتكون البنت مشيت


فكان لازم لمواكبة تطور الموضة وعصر السرعة من وضع كلمة لاختصار كل هذا التشبيه



زى زمان ماكانوا بيستخدموا فى الشعر الكناية وغيرها من أدوات الشعر التى تساعد فى توصيل المعنى عن طريق اثارة الخيال


فيروح يقول لصاحبه .. بص يالا الموزة اللى ماشية هناك ديه يروح مصفر ويمشى ورا البنت يعلقها

و يصاحبها أوحتى يديها تعليق ويرجع تانى يتسكع فى الشارع


**********************








يبدوا ان البنات المزز بدأت تفوق للى بيحصل لها فى الشوارع


وعايزين الناس تحترمهم


بس ازاى وهما مش بيحترموا نفسهم




تحياتى لكم أيها الموزز الأعزاء


Mar 20, 2008

اللعنة علينا فى مصر

المال لعنة الانسان .. كما قال ماركس

وما أكبرها لعنة عندنا فى مصر


الناس بقت مهووسة به كل الناس بقت ممكن تغش .. ترتشى أو تاخد اكراميات ايا كان اسمها
بقينا ناكل لحم الحمير والكلاب بدل اللحمة العادية

بقينا نشرب بودرة سيراميك بدل اللبن

حتى المية العادية بقوا يبيعوها لنا على انها ميه معدنية




حتى الهدوم بقى معظمها ألياف صناعية وبتتفصل اى كلام وتتباع لنا على انها موضة ومستوردة بأسعار مبالغ فيها ثلاث أضعاف

حتى عروسة المولد النهاردة وانا بشتريها لاولاد اختى بقوا يغشوها ويبيعوها باسعار غريبة
واكتشفت ان تكلفتها لا تزيد عن 3 جنيه ونصف وهما بيبعوها ب35 جنيه ده الناس اللى على الرصيف لكن المحلات عدت ال100 جنيه

حتى الشقق تدخل تشترى شقة على انها 150 متر وتلاقيها 100 متر ولما تسأله يقولك ماهو الباقى منافع يعنى السلم والحاجات ديه

يعنى انت تدفع حق 50 متر زيادة فى العقد وحق المتر يزيد عن الالفين جنيه
ده طبعا غير الزيت اللى وصل 9.75
والسكر والرز اللى عدوا ال 4 جنيه

حتى مصاريف المدارس والجامعات غلوها

وبالذات الكتب اللى لا عليها رقابة ولا اى شئ وكنا بنشترى

ده رئيسة القسم بتاعتنا معاها عربية مرسيدس اخر موديل لانها كانت بتحط الكتب ومعاها ورقة لازم تتسلم فى السكاشن وعليها 6 درجات عينى عينك واللى ماكنش بيقدمها علشان مااشتراش الكتاب كانوا بيتخصموا منه
والعميد ورئيس الجامعة كانوا عارفين
وكل ده لصالح مين ؟؟؟؟؟ ماحدش عارف
******************************

نيجى الناحية التانية بالذات عند الطبقة الوسطى وسكان مصر الجديدة ومدينة نصر والمهندسين والزمالك وغيرهم


بتلاقى المولات مليانة والكافيهات اقل حد أدنى للطلبات 15 و20 جنيه ومليانة شباب


تدخل محلات سيتى سنتر وسيتى ستارز أقل بلوزة أو جزمة ب150 جنيه ومن اقمشة رديئة


غير الموبايلات اللى بتاخد من لحمنا واللى بسببنا ساويرس بقى أغنى راجل فى مصر
علشان احنا نبعت نغمات وندردش على التلفزيون

******************************

نيجى بقى عند الجانب الاقتصادى البحت اللى المفروض يبنى البلد وهو قطاع البنوك






اللى احنا عارفينه ومتأكدين منه ان طلعت حرب عمل اول بنك مصرى وبسببه عمل كم كبير من الشركات المصرية عايشة لغاية دلوقتى

من اول السينما لغاية الصناعة

لكن دلوقتى البنوك نسيت الدور الأساسى ليها و بقت عاملة زى " كوهين " اليهودى

الشخصية الشهيرة عندنا فى مصر

واللى كان كل شغله عبارة انه يسلف فلوس وياخدها مضاعفة

والنتيجة ايه تراكم السيولة فى البنوك وبدل لما تستغلها فى انشاء مصانع وشركات بتستغلها فى التسليف والتوسع فى نظام القروض الاستهلاكية علشان تجيبلك عربية او تلاجة او تشتطب فيلتك او بيتك

وأحيانا فى عمل مشروعات ترفيهية بالدرجة الاولى او تعمل لك نظام تمويل عقارى علشان تساعد رجال الاعمال فى تسويق مشاريعهم على حساب المواطن البسيط اللى بيسعى ورا اى بارقة أمل ممكن تتفتح له


واللى مش لاقى غير كوهين يلجأ له


****************************

حتى المواطنين واللى معاهم مبلغ صغير ونفسهم يستثمروه مش بيفكروا ازاى يعملوا مشروع صغير ويكبر مع الايام لكن بيفكروا فى الكسب السريع عن طريق البورصة او عن طريق مجموعة نصابين
***********************************
زمان ماكنش كل الشباب متعلمين وخريجين جامعة وكانوا بيفخروا ان ده نجار أو عامل فى مصنع أو اسطى اد الدنيا علشان كانت ايديهم متشققة من كتر الشغل والانتاج لكن دلوقتى الشباب خريجين جامعة من طب وهندسة وعلوم وايديهم ناعمة وطرية من كتر غسيل المواعين فى المطاعم او البيع فى المحلات أو يحطوا شاى وقهوة فى الكافيهات
أحيانا بفكر لو ابنى فى يوم من الايام سألنى انا مش لاقى شغل غير فى مكانين صبى فى ورشة نجارة او جارسون فى كافيه



هاقوله روح فى الورشة لانك هاتنتج شئ فى المجتمع وفى يوم من الايام هاتبقى صاحب ورشة لكن جارسون ممكن تمد ايديك لحبة عيال لسه بياخدوا مصروفهم من ابوهم علشان

يدوك بقشيش
'
وياترى أنتم هاتجاوبوا على ولادكم تقولوا لهم ايه ؟؟؟؟؟؟

Mar 16, 2008

حكايات






قعدت جنب جدتى زى عادتى أسمع حكاويها الممتعة وأجمل مافيها انها كلها حكايات حقيقية لأشخاص حقيقين مازالت اسمائهم تتردد فى العائلة وفى البلد لغاية دلوقتى


ورغم أنها بتعيد كتير من حكايتها بس بقعد اسمعها تانى علشان احفظها أو يمكن تقول حاجة نسيتها وهى بتحكيها المرة الاولى وكانت بتقعد تقولى كمان فى كل مناسبة أبيات شعر حفظتها من جدى ، مش عارفة ان كان جدى فعلا شاعر ولا كان حافظ من الكتب القديمة
فى اليوم ده قالت لى حكاية أول مرة اشتروا فيها تلفزيون كانوا أول بيت فى الحى يدخلوه بيتهم وتانى يوم كانت قاعدة بتتفرج على مذيع فى برنامج بتسمع هو بيقول ايه لاقت أخوها الكبير دخل عليها بيزعق ايه اللى بتعمليه ده .. قاعدة بتتفرجى على راجل يا..... وشد سلك التلفزيون بعصبية ولم جه جدى عاتبه ازاى يشترى تلفزيون فى بيته بيجيب صور رجالة طول النهار وهو مش موجود
كان تصرفه فى الوقت ده مش من ناحية حرام وحلال وغض البصر والكلام ده بس ولكن كان الدافع الرئيسي هو الغيرة على أخته من صور الرجالة

والغريب ان اخوها عنده 95 سنة الآن ورغم كده ما دخلش التلفزيون بيته لغاية دلوقتى



كان متجوز واحدة من البلد أصغر منه بحوالى 12 سنة والرجالة فى الوقت ده كانوا بيتجوزوا بدرى أحيانا قبل ما يوصلوا للعشرين يعنى ماكانتش وصلت لل11 سنة ويمكن أقل كمان بس لغاية لما ماتت وهى عندها 48 سنة ماخرجتش بره البيت لوحدها ابدا وماشفتش تلفزيون خالص وماكنش عندها تليفون
كانت بتصحى الصبح زى بقية الستات زمان تعمل الفطار وتعمل الصابون فى البيت وتخبز العيش وتغسل على ايديها وترضع وتربى العيال ( أصل كان عندها 7عيال ورا بعض الفرق مابين كل عيل والتانى سنة ولا اتنين ) وتعمل الغدا بعد لما تدبح فرخة ولا بطة بأيديها من اللى كانت بتربيهم
فى البيت وتكنس وتمسح البيت ده غير طلباته لما يرجع من الشغل
ولما ماتت كان لسه عنده ستين سنة أولاده معظمهم اتجوزوا منهم اللى اخد دبلوم تجارة ومنهم اللى اخد بكالوريوس من جامعات الأزهر بس بناته ماخرجتش من البيت و كان بيجيب لهم شيخ فى البيت يحفظهم القرآن لما هو يكون موجود أو حد من أولاده الكبار أصل البنات ماكنتش بتقعد معاه كتير كان يدوبك مابين سن ال12 و15 سنة يجوزهم
وبعد موت مراته أولاده أصروا أنه يتجوز تانى علشان مايقعدش لوحده وفعلا اتجوز بنت عندها 18 سنة زى القمر والبنت كانت مبسوطة واهلها مبسوطين ان الشيخ سيد من عائلة "المسلمية " هايتجوز بنتهم وها تعيش معاه فى مصر لانهم كانوا عايشين فى البلد من غير عائلة
أصل البلد بتاعتنا مافيهاش غير خمس عائلات بس ومع الزمن لاقوا ناس جم يعيشوا معاهم من أماكن مايعرفوهاش اتجوزا وخلفوا بس ماحدش من الخمس عائلات كان بيرضى يتجوزهم علشان مايخدوش اسم العائلة لانهم كانوا بيقولوا عليهم دول ناس مالهومش أصل يبقى كانوا عاملين حاجة وحشة وهربوا من بلدهم أو من الحكومة أو ولاد حرام

أما عائلتنا فكانت عائلة بيحكوا عنها ان كلها مشايخ وولادهم مبروكين، قبر جدى الكبير من ناحية الأم مكتوب عليه شجرة العائلة وبيقولوا أننا من الأشراف يعنى من سلالة الرسول عليه الصلاة والسلام ولينا أكتر من واحد فى العائلة لما مات عملوا له مقام فى البلد
بس الله أعلم ان كان الكلام ده صح ولا زى ما عائلة بابا بتقول ان أجدادى من ناحية الأم كانوا بيضحكوا على الناس وبينصبوا عليهم وأقعد اضحك على كلامهم لأن العائلتين أصلهم عائلة واحدة يعنى ولاد عم وبينهم علاقة دم زى مابيقولواومهما كان اهو الواحد بيفرح أن عائلته ليها تاريخ ممكن نحكيه لولادنا .. نرجع للحكاية بقى ...ولما اتجوز البنت ديه خلف منها أربع عيال اتنين منهم اتولدوا بعد ما وصل لل70 سنة كان بيمشى فى الحارة وهو
عنده80 سنة وعيلين عندهم 9 و10 سنين ماسكين فى ديل جلبيته كأنهم ولاد أحفاده مش ولاده وأمهم كانت عايشة بنفس طريقة مراته الأولى بس كان مسموح لها انها تسمع اذاعة القران الكريم فى الراديو بس ولغاية دلوقتى عايشين مع بعض هى عندها 53 سنة وهو
عند ه 95 ولسه بيروح الدكان بتاعه كل يوم ساعتين ويقف يبيع بس بيقولوا ماحدش بيشترى منه لانه بيفتح بعد لما يصلى الفجر فى الجامع ويسبح لغاية الشروق ويقفل الساعة 7 الصبح وبعدين يفتح بعد صلاة العشاء ساعة كمان




بس اللى سمعته ان الولاد فى الحارة مش بيشتروا منه حاجة لان كل حاجته منتهية الصلاحية وماجبش بضاعة من يجى 3 سنين بس مراته وولاده بيقولوا انهم سايبينه يفتح الدكان كل يوم علشان هو بيبقى مبسوط لما بيعمل كدة


أحيانا كنت أمشى فى الشارع اللى فيه المحل بتاعه وألاقيه قاعد أروح أسلم عليه وأنا عارفة أنه مش شايفنى أوى ولا عارفنى من المية البيضاء اللى على عينيه الاتنين بس أقعد أفكره بيا أنا مى بنت فلانه وجدتى فلانه وجدى فلان


يقولى ازيك وازى امك وابوك وستك عاملة ايه ابقى قوليلها معلش مش قادر اروح لها أصلى مابقتش أعرف امشى زى الأول
أقوله حاضر يا عمو السيد بس ابقى خد بالك من نفسك وادعى لى

Mar 13, 2008

ياترى أنت كمان جاهز للتطبيع ..؟؟؟؟






قد يكون العنوان مستفز
وصورة علم اسرائيل فى مدونتى قد تكون مستفزة أكتر

ولكن هاقولكم بصراحة أصل أنا بقيت خائنة

فعلا خائنة لبلدى وعروبتى واسلامى وكل شئ
وعلى فكرة مش أنا لوحدى ده احنا كتير أوى
هاحكى لكم من البداية وازاى اكتشفت ده .... ء
فى مرة كنت قاعدة فى الأهرام مع أساتذة كبار من الصحفيين الاقتصاديين بعد مؤتمر صحفى عقده المالك السعودى الجديد لعمر افندى
وكان مجال حديثنا كله أن الراجل ده شكله مشبوه وأنه لا يريد يطور فعلا المحلات ولا اى شئ وهدفه فى النهاية الحصول على قروض وجنى أرباح بطرق غير مباشرة وهو يعلم أن هذه الطرق ستفقده بالتأكيد عمر أفندى
وقال أحد الصحفيين الكبار : مش بعيد يبيعه لمستثمر اسرئيلى
فلم أشعر بنفسى إلا وأنا بقول له : وايه يعنى مستثمر اسرائيلى .. المشكلة مش فى كدة المشكلة أن الراجل ده شكله مشبوه
وفجأة لاقيت هجوم فظيع عليا من كل الصحفيين الموجودين ....ايه يعنى مستثمر اسرائيلى!!!!1

بقى احنا قاعدين بندافع عن رموز هامة فى البلد وأنتى جاية تقولى كدة
قلت لهم احنا مش ماضيين اتفاقية سلام واتفاقية الكويز وكلنا عارفين أن معظم رجال الأعمال اللى بنتعامل معاهم بيتعاملوا مع اسرائيل
وعند هذه الجملة وعند هذا الهجوم وعند تأملى لكلامى ولنفسى حسيت انى فعلا بدأت أقع فى وادى مظلم نسيت فيه أشياء كثيرة جدا أهمها تاريخنا وأعدائنا الحقيقيين

وتأكدت أنى أعانى من فقدان ثقافة الصراع الحقيقى بينا وبين اسرائيل التى قال عنها الكاتب محمد حسنين هيكل وأشار الى أهميتها وضرورة عودتها مرة أخرى لأننا لسنا فى امان كامل

الموقف الآخر الذى أثبت لى بأنى لست وحدى الخائنة لبلدى و لعروبتى ولتاريخى ولاسلامى
كنا فى دورة ثقافية فى مركز الأهرام الاستراتيجى وكان أغلب الموجودين طلبة جامعة من سنة 18 الى سن 25 سنة

وكانت المفاجأة أن مصطفى الفقى السياسى المعروف ورئيس لجنة العلاقات الخارجية بمجلس الشعب هو الذى سيلقى علينا المحاضرة

فتكلم كثيرا عن مشاكل المنطقة وعلاقات مصر ودورها فى المنطقة والعلاقات الدولية التى تقوم على المصالح
وقام أحد الطلبة وهو طالب فى كلية سياسة واقتصاد قسم علوم سياسية يسأله لماذا لا نتعاون مع اسرائيل ونستفيد من خبرتها فى التكنولوجية النووية واحنا بنعمل مشروع الطاقة النووية المصرية ؟؟

ولن أنسى رد مصطفى الفقى أبدا عليه وهو شبه غاضب يقول له .. ياه هو أنت جاهز للتطبيع بالدرجة ديه ؟؟
لم تجد الا اسرائيل لكى تأخد منها التكنولوجيا بتاعتها ما عندك كل دول العالم وأولها الهند لكى تستفيد منها
ثانيا . هل تعتقد أن اسرائيل ستعطيك شئ أساسا .. هى فعلا قد ترحب ولكنها ستعطيك السم فى العسل
للأسف الموقف ده أكد لى فعلا أننا - الشباب - فقدنا ثقافة الصراع مع أعدائنا خاصة مع أهم عدو وهو اسرائيل
فمن يحلل موقف هذا الطالب سيعرف أنه جاهز للتطبيع
واعترف باسرئيل كدولة بجوارنا لنا حق التعامل معها متناسيا أن اسرائيل قد قامت على كثير من دماء المصريين والعرب وتشريدهم وأن هذه الأرض كان مكانها زمان دولة اسمها فلسطين

يبدو اننا نسينا القضية الفلسطينية أساسا

ونسينا أن أمن فلسطين وغزة يؤثر على مصر

ونسينا أن هدف اسرئيل الحالى هو أن تجعل سيناء ملجأ لآلاف الفلسطينين التى ستطردهم من أرضهم

وتسبب لمصر مشاكل كثيرة
أعترف لكم أنى ألوم نفسى الآن
وألوم كل جيلى
وأعترف أننا نستحق القتل فى ميدان عام رميا بالأحذية وليس رميا بالرصاص
ولكن هناك أمل أننا يجب أن نعيد قراءة تاريخنا ونعيد ترتيب أولويات حياتنا وألا ننساق وراء التفاهات من القضايا
وعندما تعود ثقافة الصراع لنا ليس مطلوب منا أن نحارب فى وقت السلم ولكن مطلوب منا الحذر الدائم والايمان بقضايانا ومنافستهم فى كافة المجالات
يجب أن نعلم أن اسرئيل التى لم تنشأ الا من فترة قليلة استطاعت أن تحصد المراكز الأول فى التعليم والبحث العلمى والتكنولوجيا
وبتطورها هذا ستصبح خطر علينا اكثر
لابد أن نعيد النظر فى الموقف والقضية
ومعنى موقفنا اننا لا نتذكر قضيتنا فى فلسطين الا عند الكوارث ورؤية مجموعة الصور للاطفال الشهداء وهدم المنازل
والتى بدأت تختفى من الاعلام رغم انها تحدث كل يوم وكل ساعة


ويبدو اننا لن نستيقظ الا بعد هدم المسجد الأقصى ولكن فى هذه اللحظة لن يكون لنا الحق فى أن نقول أن هذه هى أرضنا وأرض العرب
ياترى هاتصحى زينا ولا أنت لسه جاهز للتطبيع ..؟؟؟