أنا الأيام ديه مخنوقة مخنوقة أوى من البلد وأهل البلد ويمكن أكتر حاجة مخنوقة منها هى نفسى أنا
كل حاجة بقت مملة كل حاجة بقت شبه بعض الواحد نفسه يسافر برة البلد ديه وبره كل التوتر اللى فى البلد ده
ويبعد عن كل أدوات التكنولوجيا اللى نغصت علينا عيشتنا الواحد مابقاش يعرف يشوف السما لانه لما بيبص فوق يلاقى خرم صغير مابين عمارات طويلة شكلها وحش لونه ازرق
ولو راح مكان بعيد وبص بعيد يتفرج على السماء اما يلاقى دخان مصانع واما طيارات معدية
واما واحد عبيط معدى يقولى مالك يا آنسة فيه حاجة طارت منك ؟
نفسى أسافر فى مكان مافيهوش غير شمس ومية وسماء زرقاء بعيد عن قناة الجزيرة وأخبار الكوارث وبعيد عن القنوات اmbc 2 ,mbc action
nاللى طول النهار شغالة عنف وقتل وتوتر وبعيد عن ألاعيب هالة سرحان وبعيد عن الجامعة والشوارع والمواصلات المقرفة وبعيد عن دكاترة الجامعة اللى بيعاملونا على اننا أطفال مش فاهمين حاجة وهما بس اللى فاهمين كل حاجة ومايعرفوش اللى احنا اللى بنعاملهم على انهم أطفال بنسكتهم بشراء الكتب الغالية وخلاص وعمل الواجب اللى ممكن يعمله طفل فى ابتدائى
نفسى أسافر فى مكان بعيد عن جرائد المعارضة اللى كرهتنا فى نفسنا و أبعد عن الناس الى ماورهاش حاجة غير النميمة والكلام عن الفساد والكلام عن الاحباط والاكتئاب
نفسى أسافر في مكان أكلم الناس فيه وأقولهم أخباركم ايه يقولولى أخبار سعيد مش يردوا عليا أخبارى زى أهرامى مفيش جديد
بجد بجد الحياة بقت خنيقة أوىىىىىىىىى
3 comments:
ليه بس الخنقة دي كلها ؟؟
فعلا بتيجي ساعات على الواحد بيتخنق من كل حاجة حواليه
بس شوية وهترجعى تانى زى الاول ... متقلقيش
حاولى تاخدى فترة استرخاء بعيدا عن الصحافة والمعارضة والكلام اللى يتعب الاعصاب ده
وارجعى تانى ريفريش
ربنا معاكى يارب ويفك خنقتك
:)
كلماتك صحيحة ربما لانها تعكس واقعا اضحى بيننا بالفعل
ولكن رؤيتك لهذا الواقع تحتاج الى اعادة نظر حتى لا يعكس الواقع همومه عليك
فلابد ان نكون اقوى من واقعنا حتى نستطيع ان نتفاعل معه ويكون للايجابية طيف فى حياتنا
ــــ
المرة دى اعتبرى اسم مدونتى تفاؤلات
ــ
دمت بكل خير
مش هقدر أهون عليكى
ولا أقولك كلام يهديكى لسبببسيط قوى
هو انى مخنوق اكتر منك
Post a Comment