ياريت مصر ترجع حلوة

دخلت أكتب هذا البوسط بعد لفة طويلة دامت أكتر من ساعتين مابن المدونات ومش هانكر

بقيت مشحونة جامد ضد الحكومة وضد البلد وضد المدونين وضد الاسلام وضد الناس كلهامش عارفة فيه ايه..؟

أدخل على مدونة زى منال وعلاء ألاقى الناس قاعدة تشتم فى الحكومة وبيان باسماء الناس اللى اتقبض عليهم يوم الخميس فى ميدان التحرير

أدخل على مدونة تانية الاقى ناس قاعدة تشتم فى المحجبات والمنتقبات ومعترض على واحدة مسلمة رفضت تسلم باليد على رئيسها فى العمل

وموقع تانى بيطالب بالحرية وموقع تانى قاعد بيشتم فى الحكومة علشان بيع البنوك

قلت يابختهم قادرين يكتبوا حاجات معارضة تهز القلب وتخلى أصغر واحد ممكن يروح يقتل رئيس الجمهورية

بس ياترى هل مصر بقت وحشة كدة ؟؟

ولا انتم بس اللى خليتوا الدنيا سودا ادامنا أنا نفسى أشوف مصر الحلوة .. مصر اللى زمان كان فيها راحة البال والهدوء والضحكة الرايقة .. مصر اللى كان فيها فقراء كتير يمكن أكتر من دلوقتى بس كانوا عايشين سعداء.. مصر اللى كان فيها اعتقالات وكان ناسها عايشين برده بامان .. مصر اللى كان فيها كل حاجة وحشة اتكلمتوا عنها بس كانت مصر هى أمى نيلها هو دمى تصدق يااخى انت وهو ان مصر ديه هاترجع حلوة بجد لو اتسحب بساط حرية التعبير من الانترنت والفضائيات وصحف المعارضة اللى ممكن تعترض فى يوم من الأيام لو رئيس الوزراء دخل الحمام وتعمل لكم سبق صحفى عن دخول نظيف الحمام وعن أنواع الأكل اللى أكله بعد عرض عملته السوداء على مراكز التحاليل المدنية ولجان المطالبة بالحريات وحقوق الانسان أنا مستعدة انى أعيش تحت كل وسائل القهر والاستبداد على انى افتح التلفزيون الاقى وائل الابراشى فاتح قضية البهائية فى مصر وتحدث فيه على انه ظاهرة وانهم شوية شوية ممكن يقوموا بثورةاو انى الاقى مصطفى بكرى عامل ملف عن خطف المسيحيات واجبارهم على الدخول فى الاسلام ليه هو احنا للدرجة ديه هبل علشان نصدق ان خلاص المسلمين بقوا وحشين للدرجة ديه أو انى الاقى واحد على الانترنت يشتم ويسب أهالينا وديننا

ياجماعة عايزين نفكر ازاى نبنى بلدنا صح بدون مانضيع عمرنا فى توتر وقلق وصراع مع كل الجهات بيخسر فيه كل الأطراف

فانا اكيد مش راضية عن الحكومة

ولكن برده مش راضية عنكم

لانى مش حاسة اننى لو انا انضميت ليكم ونزلت معاكم مظاهرة هو ده الحل هو ده خلاص اللى هايرجع البلد نضيفة زى ماكانت لان مش كل الشعب المصرى حاسس بيكم ولا يعرف اساسا انه بيكون فيه مظاهرات بيتجمع فيها حوالى 300 شخص كل ففترة فى ميدان التحرير غير لما بتعملوا زحمة وتوقفوا الطرق وينزل الناس من العربيات وهم فى قمة النرفزة ويقعد يقول الله يهدكم انتم والحكومة فى يوم واحد واياك تتحرقوا بجاز سيبونا نروح مصالحنا بقى لازم نفكر فى الواقع الحقيقى للبلد ديه بمختلف فئاتها لان انتم قلة والحكومة قلة والأغلبية ارفت منكم انتم الاتنين