بصراحة أنا مش فاهمة الهبل اللى بيحصل ده
كل شوية يجى لى تحذير مجهول المصدر قاطعوا البضائع الفلانية بسبب اهانتها للفظ الجلالة
وابص على اللى هما بيقولوا عليه مالاقيش لفظ الجلالة اصلا واحس اننا احنا اللى بنهين لفظ الجلالة اصلا بتخيلنا ان اى تكرار لحرف اللام بيبقى كلمة الله
ده غير تخيلاتنا بجمل غريبة مثل الدعوة لمقاطعة مشروب كوكاكولا بسبب اننا لو قرأت الشعار من الخلف هاتلاقى مكتوب جملة لا اله لا محمد وبحاول بقالى كام سنة انى اقعد اتخيل مثلهم هذه الجملة على الزجاجة ماعرفش
يعنى هما وهما بيعملوا الشعار قصدوا انهم يكتبوا كدة لاستفزاز المسللمين ؟ بصراحة تفكيرنا بقى عجيب
وآخر هذه الدعابات البايخة مانشرته جريدة الوفد عن اهانة لفظ الجلالة بمحلات عمر افندى وذلك لما اكتشفوا وجود حذاء مكتوب على نعله لفظ الجلالة والغريب انهم صوروه وانا اهو بقالى ساعة بدور على لفظ الجلالة اللى هما بيقولوا عليه مش لاقيه
معاكم تفاصيل الخبر ومعاكم الصورة ياربيت حد يفهمنى اللى بيحصل
إهانة للفظ الجلالة في فروع عمر أفندي
شهد أحد فروع شركة عمر أفندي المملوكة لشركة أنوال »السعودية« واقعة غريبة تضمنت إهانة للفظ الجلالة.. قامت إدارة فرع عدلي بوسط البلد بشراء كميات كبيرة من الأحذية محفور علي نعلها لفظ الجلالة بشكل بارز. كشف أحد العاملين بالفرع عن أن هذه الأحذية مجهولة المصدر ولا يوجد لها فواتير شراء. كانت الشركة قد اشترت كمية كبيرة من هذه الأحذية منذ 7 أشهر وعندما علمت الإدارة بالواقعة لم تعدها إلي مصدرها.
يبلغ ثمن الحذاء الواحد 70 جنيها وبعد تراجع المبيعات من قبل الجمهور خفضت الشركة سعر الحذاء إلي 30 جنيها
3 comments:
والله بجد بقت نيله احنا بنلف الحاجات بمزاجنا يا بنتى صدقينى يعنى مش بتكون بقصد بس حسب اللى بيشوف ويالف
بقولك ايه متحرقيش دمك لان الحاجات دى بتبين ليه قد ايه احنا متخلفين
سيبك حبة معقدين نفسياً والجهله بيصدقوا اي حاجة ويقعدوا يبعتوها
ياجماعة والله المشكلة مش مشكلة إهانة ولفظ جلالة والكلام ده كله. المشكلة ان فيه صحفيين مرتزقة كتير بيدروا على الخبر بملقاط ومش خبر حقيقي طبعاً، لأ خبر من عينة البني آدم اللي عض الكلب. والمصيبة انهم مش فارق معاهم التخلف اللي بيزودوه في عقول الناس ويؤكدوه. والأدهى والأمر لما الحكومة بجلالة قدرها تنزل للمستوى المنحط ده في التفكير وتبدأ بقى في حملات تفتيش وضبطيات وكلام فاضي من ده. كله عايز يعمل بطل في التمثيلية العبيطة دي واهو بقى تيجي بعلاوة تيجي بمكافأة تيجي بترقية على الجهود الفظيعة اللي بيقوموا بيها ولجان ورا لجان ورا لجان وتضيع فلوس وفلوس وفلوس ورا البدلات والقتة تفضل محلولة وتوتة توتة فرغت الحدوتة. وعجبي عليكي يامصر
Post a Comment