سؤال جه على بالى نتيجة اشاعة طلعت عندنا فى الشغل عن تغيير وزارى مرتقب وهو
ياترى مين هى الحكومة الجاية ؟؟؟
هاتكون برده رجال أعمال ولا أساتذة جامعة ولا مجرد ناس محظوظة رماها القدر فى هذا المنصب بالصدفة
نظيف
رئيس الوزراء
بيقولوا انك حاولت تعمل حاجة كويسة فى البلد .. بس بصراحة أنا ماحستش بحاجة
حد فيكم حس بحاجة ؟؟؟
رشيد محمد رشيد
وزير التجارة الخارجية والصناعة
قابلته كذا مرة و انسان فعلا هادئ و محترم جدا على المستوى الشخصى
ويمكن علشان هو مش ابن سوق ولبط زى مابيقولوا ماعرفش يظبط السوق
عشنا فى عهدك أقوى موجة لارتفاع الاسعار ..وأرجوك ماتقولش الاسعار العالمية أكيد كان فيه 100 حل
لأنك وصلتنا أننا بقينا نترحم على أيام التسعيرة
بس ماحدش هاينسى اللى عملته وانشائك لجهاز حماية المنافسة ومنع الاحتكار وجهاز حماية المستهلك
ونتمنى أن اللى يجى بعدك يعرف يفعل دورهم
محمود محيي الدين
وزير الاستثمار
مهما عملت ماحدش هاينسى ان فى الفترة اللى مسكت فيها قدرت تبيع أكبر عدد من شركات القطاع العام
الجاهزة هدايا لرجال الأعمال اللى بقوا يتحكموا فى قوت الشعب
بدل لما تشجعهم انهم يبنوا مصانع جديدة ويعملوا شركات جديدة تزود بيها الانتاج
صدقنى لو كنت عملت كدة كان ممكن نصدق أن فيه 10 مليارات دولار استثمارات اجنبية جديدة فى مصر
لكن الى انت عملته انك بعت استثمارات المصريين للأجانب
و بقى كدة يامحيي عايز تلغى نظام تقسيط الشقق وتخلى النظام الأساسى التمويل العقارى علشان الشباب يدفع فائدة 8 و9 % فائدة مركبة غير حق الشقة ومصاريف اجراءات الحصول على التمويل
بصراحة يا محيي أنت مفترى على الشعب
أحمد المغربى
وزير الاسكان فى الشارع
لما الشقة ال100 متر توصل ل500 ألف فى الفترة اللى مسكت فيها الوزارة أكيد فيه حاجة مش مظبوطة
ولما رجل أعمال ياخد أراضى بالفداداين ببلاش علشان يبنى مدينة سكنية الشقة فيها ب800 ألف جنيه برده فيه حاجة مش مظبوطة
ولما أنت تحط سياسة أن يكون اسكان الشباب كله الجديد شقق 60 متر اوضة وصالة علشان تقلل الزيادة السكانية ويطلع عنيهم علشان يعرفوا ياخدوا الشقة وفى الآخر تبيع أراضى بتراب الفلوس علشان يتعمل عليها قصور وفيلل ومدن سياحية يبقى استفزاز صريح للشعب ولا لا
نكتة : المغربى فى بيان صحفى أن أسعار الشقق فى مصر بقت فى متناول الشباب .. السعودى والعراقى والاماراتى
يوسف بطرس غالى
وزير المالية
عارفة أنك وزير بقالك كتير .. يمكن من قبل مااتولد كمان
وعلى فكرة انا اشتغلت فى وزارتك شوية وشفت الأبهة اللى انتى عاملها هناك بجد أنت مخلى وزارتك جنة بالذات مكتبك ومكتب المستشاريين بتوعك
ورغم انك طلعت عين الشعب بالضرائب بالذات أنا لأنى مستاءة كتير من موضوع الضرائب الدخل ديه
بس أنا مبسوطة منك لأنك أنت اللى فتحت نفس الشعب على الاضرابات
وعلشان كدة هاديك اعفاء مش هاتكلم عن سلبيات تانى
بس كلمة فى ودنك الكبيرة ديه .. أنا عندى احساس انك لو قعدت الحكومة الجاية أكيد هاتدخل التاريخ لأنك هاتكون السبب فى الثورة اللى هاتحصل فى مصر
حبيب العادلى
وزير الداخلية
مرة ظابط شرطة قالى ان الوزير ده لو ماسبش الوزارة والصحفيين بعدوا عنا .. يبقى أحسن يخصخصوا وزارة الداخلية لأننا مش عارفين نشتغل
بس أحييك على الفيلم الرعب اللى عملته لنا يوم الاضراب .. بصراحة كان عرض رائع كنت خايفة أتنفس وانا ماشية فى الشارع
وأكيد أثبت قدرتك على كبت الحريات وخنق أى محاولة لانفلات الأمن
بس كنت بسأل نفسى هو لو مصر حصل عليها عدوان هانلاقى فعلا الأمن ده
ونفسى أسالك هو انت ليه شاطر فى تكميم الأفواه ومش عارف تظبط المرور
أنا عندى احساس كبير انك مش هاتتغير مع التغيير الوزارى بس لو فعلا كملت فى الوزراة سيبك من حبة المثقفين دولا اللى بيهددوا بالاضراب وظبط لنا المرور الله يخليك لحسن اتخنقنا خلاص
محمد منصور
وزير النقل
مش عارفة أقولك ايه بس انت افتريت على الشعب أوى علشان حرام عليك تحط عبء ارتفاع تذاكر المواصلات كمان على الشعب
رغم ان ده المجال الوحيد اللى بيجيب تكاليفه خلى الاتوبيس المكيف زى ماهو بس حرام عليك اتوبيسات الغلابة تخليها بجنيه وجنيه ونصف
وتخلى متوسط انفاق الاسرة على المواصلات علشان يروحوا الشغل والمدارس والجامعات 10 جنيه فى اليوم
فكر فيها كدة وراجع نفسك
على مصيلحى
وزير التضامن الاجتماعى
وزير التضامن الاجتماعى
أنا آسفة لأنى بجد مش بحب أجرح حد بس بجد
أنت اكتر وزير فشلت فى مهمتك لانك اكيد ماكنتش فاهم انت المفروض تعمل ايه اصلا
والدليل على كدة ان الرئيس تدخل شخصيا علشان يشوف حل فى موضوع الطوابير العيش ديه
وكمان ده الرغيف وصل فى عهدك ل50 قرش يا مفترى
أنا لو كنت منك كنت قدمت استقالتى علشان مش كل مرة حد يروح يشترى فيها عيش يدعى عليك
وبالذات لو نام جعان أكيد ربنا مش هايرحمك
8 comments:
هو في تكمله للبوست دا ولا ايه
انا كنت مستني المعلمة عائشة عبد الهادي .. علي راي فاتن حمامة مش خسارة فيها نص عمود بستفة ..
بس ادام كل المصايب اللي عملتها هل البستفه تكفي !!
دانتي طنشتي وزراء مهمين كمان، وزير الخارحية الهمام في كسر الأقدام، ووزيرة مش عارف إية العاملة الحاجة عيشة، ووالة مانا فاكر هوا في وزارة حكم محلي لسة والا لغوها
عموما إحفظي البوست دا كويس علشان كمان خمس سنين مجرد حتشيلي الصور والأسامي وتحطي صور وأسامي الجداد من غير متغيري تعليقاتك، ويمكن تغيري شوية اسعار زي رغيف العيش بقي بـ 3 جنية يا مفتري والشقة الـ 100 متر بقت بـ2 مليون جنية، حاجات كدة
تحياتي علي البوست الجميل دا
بعد تجارب مريرة ثبت بالدليل القاطع ان مشكلة مصر ليست في الاسماء
وانما في السياسات
وبما ان واضع السياسات لم ولن يتغير
فبالتالي لا فائدة من اي تعديل او تغيير وزاري
تحياتي
بصراحة الوزارة عاوزة تتغير من اصغر لاكبر راس فيها
ايونننن
راس
مش موظف
لان التعامل يها بقى زي السوق
وفي السوق
التجار بيستخدمو مصطلح الراس
مش الموظف
سلمت يدكي
مدونتك حلوة اوى تحياتى
متهيألى هيكون تغيير وزارى محدود
هيتغير فيه كام وزير مفيهمش حد من اللى ذكرتيهم
بل ان الشائعات تؤكد ان رئيس الوزراء القادم واحد منهم
لاتستطيع التقات صوره فى الضلمه وخاصه لو كان تغيير الوجوه وراه نفس الخلفيه السوده
لا جامده الله ينور عايزين بقيت الوزرا
Post a Comment